چوپانی

قدرت چوپانی چاراوْیماغێن گۆنئی باتێسێندا اوْلان خاتێن گۆنئیی کندینده آنادان اوْلۇب، منجه ایندیسه تئهرانین ایسلامشهرینده یاشایێر، اوْنۇن گؤزه‌ل شئعرلری اوْلاراق نوحه قوشماقدادا اینجه ایشلری وار. ایندیسه اوْندان حضرت علیعمین شهاده‌تینه گؤره بیر جوشی اوْخۇیاق.

 

حضرت علی علیه‌السّلامین یارالانماسێ جوشی‌سی

قدرت چوپانی (راعی)

 

سس کوفه‌ده‌ن اۇجالدێ، حیدر بوْیاندێ قانـه

مئحـرابیـده اوْ شیـر-ی-داور، بــوْیـانـدێ قـانـه

 

مسجید بوْیاندێ قانه، منبر بوْیاندێ قانه

سجده ائده‌ن جبین-ی-انور بوْیاندێ قانه


ائتدی دوباره سجده، اللــه‌ر بوْیاندێ قانـه

سجّاده اوْلـدۇ قـانـلا، احمـر بـوْیاندێ قانه

باش قوْزادێ جمال-ی-اکبر بوْیاندێ قانه

«فُزتُ و رَبّ» دییه‌نده، لبله‌ر بوْیاندێ قانه

آغزێنداکێ لئسان-ی-داور بوْیاندێ قانه

کیپریک چالاندا حقّ‌بین، گؤزله‌ر بوْیاندێ قانه

دۆشمه‌ن الینده عوریان، خنجه‌ر بوْیاندێ قانه

 

سسلیر هواده جیبریل، شاه-ی-ویلایه‌ت اؤلدۆ

معنی-ی-لفظ-ی-ایمان، حقّ-وْ-حقیقه‌ت اؤلدۆ

اهل-ی-شهامه‌ت اؤلدۆ، باب-ی-کرامه‌ت اؤلدۆ

مرد-ی-دییانه‌ت اؤلدۆ، تقوا-وْ-وحده‌ت اؤلدۆ

دین اؤلدۆ، میلله‌ت اؤلدۆ، دونیای-ی-امّت اؤلدۆ

سیمای وحده‌ت اؤلدۆ، تفسیر-ی-همّت اؤلدۆ

پئیغه‌مبه‌رین وصی‌سی، نور-ی-هیدایه‌ت اؤلدۆ

...

اوْلدۇ گۆل-ی-شرافه‌ت، پرپر بوْیاندێ قانه

مئحراب ایچینده شاه-ی-مردان بوْیاندێ قانه

تنها نه شاه-ی-مردان، ایمان بوْیاندێ قانه

ایمان نه بلکه سؤیله، قرآن بوْیاندێ قانه

بوهتا دۆشۆبدۆ چرخ-ی-دؤوران بوْیاندێ قانه

...

ارض-وْ-سما ائدیبدی، توفان بوْیاندێ قانه

گویا تمام-ی-دونیا، یئکسان بوْیاندێ قانه

یئر اۆسته ذات-ی-حقّه، مظهر بوْیاندێ قانه