حضرت رقیّه (س) قتلگاهدا آتاسێنێن باشسێز بده‌نیله ویداع ائده‌ره‌ک سؤیلۆر:

قوْشار: کریمی

 

سنیـن یانـۇنـدا گـؤر بابا، وۇرانـدا کـوفییان منـی

گئدینجه شامه اؤلدۆره‌ر، یقین بۇ ساریبان منـی


 

هانی ازه‌لکی عیزّه‌تیم، نه گلدی آل-ی-هاشیمه؟

قالێب هایاندا اکبریم؟ وۇرۇللا قمچی باشیمه

عمیم هانی؟ گلیب باخا گؤزیمده قانلێ یاشیمه

گؤره سالێب نه حالته؟ بۇ گرده‌ن-ی-زمان منی

 

مگه‌ر یتیمه قێزلارێ سالار بۇ حاله روزگار

نه وار باشێمدا معجریم، نه یۆزده بُرقَع-وْ-خمار

جفای-ی-تازییانه دن وجودیم اوْلدۇ زخمدار

ندیر گۆناهیم ائی بابا؟ وۇرۇر بۇ شامییان منی

 

ائدیبله غم خزینه‌سی، بۇ قلب-ی-پاره پاره‌می

یاناندا خئیمه‌گاهیمیز، آلێبلا گوشواره‌می

یوْخۇمدۇ بیر کسیم بابا، کسیبله راه-ی-چاره‌می

سالێبلا آت قاباغێنا، ائدیبله باغرێ قان منی

 

یتیمه بیر قێزام بابا، اسیر-وْ-خواره‌م آغلارام

گئدیبدی صبر-وْ-طاقه‌تیم، علیل-وْ-زاره‌م آغلارام

گله‌ن وۇرار، گئده‌ن وۇرار، یوْخۇمدۇ چاره‌م آغلارام

غریق-ی-سئیل-ی-اشک ائده‌ر، بۇ چشم-ی-خونفیشان منی

 

وۇرۇبدێ سیلی شئمر-ی-دون، بنؤوشه تک یانێب اۆزۆم

اوْدۇر کی متّصل تؤکۆر، عذاره قانلێ گؤزیاشێم

قوْلۇمۇ باغلایێب عدو، دؤنۆبدۆ شامه گۆندۆزۆم

کسیر قوْلۇمۇ اینجیدیر، بۇ بند-ی-ریسمان منی

 

نقدری صبر ائدیم مگه‌ر، دیل آچمایێم شیکایه‌ته

هله جفاسی دۆشمه‌نین، یئتیشمه‌ییب نهایه‌ته

عیالیوی اسیر ائدیب، چکیلله هر ویلایه‌ته

خرابه‌لرده اؤلدۆرۆر، بۇ مئحنه‌ت-ی-گیران منی

 

علاج یوْخدۇ دینمیره‌م، وۇراندا شئمر عیتابیله

باشۇن دالێنجا شامه دک، گره‌ک گله‌م شیتابیله

وئره‌م خرابه‌لرده جان، بۇ سوز-وْ-ائلتیهابیله

غم-ی-فیراقون ائیله‌ییب، علیل-وْ-ناتوان منی

 

دوْیۇنجا آغلێیانمادێم، اۆره‌کده قالدێ حسره‌تیم

دییار-ی-شامه عازیمه‌م، چتیندی بیر رجعتیم

بۇیۇر دارێخماسێن بی‌بیم، یئتیشسه هر اذیتیم

قاباغا وئرسین اللــه‌رین، وۇراندا ساریبان منی

 

بۇ اهل-ی-کینه آنلایێب کی من چوْخ ایستیره‌م سنی

اوْدۇر سبب کی چکدیله‌ر، بۇ قتلگاهیده‌ن منی

موزاحیم اوْلمایێم داخێ، مرخّص ائت رقیّه‌نی

اگرچی سن‌سیز اؤلدۆرۆر، بۇ ناله-وْ-فغان منی

 

گله‌نده؛ قارداشێم منی سوار ائدیردی محمیله

محبّت‌ ایله ائندیریب یئته‌نده هر منازیله

اوْدۇر کی آختارێر گؤزۆم، کی بلکه اکبریم گله

سوار ائده کجاوییه اوْ یار-ی-مئریبان منی

 

کریمی‌نین رقیّه‌ده‌ن حیمایه‌ت آرزوسی وار

همین بۇ شئعره جاییزه شفاعه‌ت آرزوسی وار

هوای-ی-شامی چوْخ سئویر، زییاره‌ت آرزوسی وار

                دئییر یئتیر اوْ قبره ائی، خودای-ی-لامکان منی