بـدنــون قــالێب ائلــه بیــر حـــالا

گلـه‌ن آغـلئیـور، گئــده‌ن آغلئییــر

آلۇرام سسین منه سس قوْشۇر

سنــه اؤز آتێـب حســن آغلئیـور

قوْشار: هادی اردبیلی

 ****

 قاسم ای قارداشێم یادگاری

وی حسینون گؤزل غمگساری

گلمیشه‌م آچ گؤزۆن داده قاسم

یاتما بۇ غملی صحراده قاسم

نوجوانیم بالا باغرێ قانێم (2)

قوْشار: تقائی اردبیلی


حضرت قاسم باشێ اۆسته امام(ع) اوْخشایێر:

قوْشار: هادی اردبیلی

 

بـدنــون قــالێب ائلــه بیــر حـــالا

گلـه‌ن آغـلئیـور، گئــده‌ن آغلئییــر

آلۇرام سسین منه سس قوْشۇر

سنــه اؤز آتێـب حســن آغلئیـور

 

دیزیم اۆسته باشێوێ آلمێشام

یاراوێ معایینه ائیلییه‌م

منی باشۇن اۆسته گؤرۆر فلک

گؤزۆ یاشلێ قدّ-ی-رساسی خم

یئل اسیر سپیر توْزۇ توْپراغێ

یۆزۆن اؤرتۆلۆر سنی گؤرمیره‌م

توْزا توْپراغا بله‌شن یۆزه

اۆره‌گیمده‌کی مُحَن آغلئیور

 

اۆره‌گیمه اکبریمین داغێ

بئلیمه نه گلدی سن ائیله‌دون

قانێلان بۇ دشت-وْ-کویرده

گۆل اکیب چؤلۆ چمن ائیله‌دون

آتاسێز بالا بۇ بلا چؤلۆن

اؤزیوه نده‌‌ن وطن ائیله‌دون

یئل اسیب وئریب وطنه خبر

غم-ی-هئجریوه وطن آغلئیور

 

یارالێ قناری کیمی اوْغۇل

قانێوێ جمالیوه یاخمۇسان

منه ظۆلمت ائیله‌ییب عالمی

اؤزۆن ائی سیتاره نه آخمێسان

اؤپۆره‌م گؤزۆن سنی سسلیره‌م

گؤز آچێب حسینیوه باخمێسان

گؤره‌سن بۇ اوْغلۇ اؤله‌ن عمون

باشۇن اۆسته بس نده‌ن آغلئیور

 

ائله بیر یامان حالا قالمێشام

گؤره‌ن اوْلسا اوْندا بیله‌ر نه وار

باشۇن اۆسته باشیمه وۇرجاغێن

سپه-ی-ظلاله تئز ال چالار

بۇ سؤزۆ صراحتیله‌ن دییه‌م

بیلینه‌ر حسین نه حالا قالار

ائویمی یێخێب بئلیمی بۆکۆب

سنی الده اؤلدۆره‌ن آغلئیور

 

بیرینین نئجه الی تیتره‌ییر

داشێن اۆسته آیینه‌نی سالا

قۇمۇن اۆسته یاره‌لی پئیکرون

اوْ حالا قالێب سنین آی بالا

اۆره‌گ اهلی یوْخدۇ باخێب بئله

مُحَنون سالێب منی نه حالا

سنه گر منیم گؤزۆم آغلاسا

منه دوْغرانان بدن آغلئیور

 

حضرت قاسم باشێ اۆسته امام(ع) اوْخشایێر

(کاروان رفته منزل به منزل ریتمیله)

قوْشار: تقائی اردبیلی

 

قاسم ای قارداشێم یادگاری

وی حسینون گؤزل غمگساری

گلمیشه‌م آچ گؤزۆن داده قاسم

یاتما بۇ غملی صحراده قاسم

نوجوانیم بالا باغرێ قانێم (2)

 

گلدی ادرک سسون خئیمه‌گاهه

اوج ائدیب ناله‌لر مهر-وْ-ماهه

خورداجا قێزلارێن سوز-ی-آهی

دوْلدۇرۇب عرصه‌ی-ی-خئیمه‌گاهی

نوجوانیم بالا باغرێ قانێم (2)

 

باغریمی ائیله‌دی فرقتون قان

باشێوێن اۆسته گلدیم شتابان

حئیف اوْلا ائی جوان-ی-دلاور

جیسمیوی دوْغرئییب قوم-ی-کافر

نوجوانیم بالا باغرێ قانێم (2)

 

ای منیم خئیمه‌مین چئلچیراغی

جیسمیوی محو ائدیب آت آیاغێ

سینه‌وی چاک ائدیب نئیزه خنجر

دوْغرانێب پئیکرون مثل-ی-اکبر

نوجوانیم بالا باغرێ قانێم (2)

 

آز منی نار-ی-هئجره آلێشدێر

حقّه خاطیر منی بیر دانێشدێر

مُحنتون ائیله‌ییب دل شیکسته

آز قالێر جان وئره‌م باشۇن اۆسته

نوجوانیم بالا باغرێ قانێم (2)

 

قامتون گلمیر الان قییامه

نعشیوی حمل ائده‌م تک خییامه

دوره‌ده دوشمن ائیلیر شماتت

یوْخدۇ منده داخی تاب-وْ-طاقت

نوجوانیم بالا باغرێ قانێم (2)

 

اوج ائدیر ناله نای-ی-دلیمده‌ن

یالقۇزام دور بالا دۇت الیمده‌ن

خئیمه‌گاهه گئده‌ک باری باهم

عمّه‌وی رام ائده‌ک باری باهم

نوجوانیم بالا باغرێ قانێم (2)

 

دۆشمۆسن گۆلشنه لاله مثلی

قان یۆزۆنده دۇرۇب ژاله میثلی

آچ گؤزۆن باخ منه باغرێ قانه‌م

گۆللـری تئز سوْلان باغبانه‌م

نوجوانیم بالا باغرێ قانێم (2)

 

قان آخێر پیکروندان مینایه

فئدیه‌سن دین-ی-حقّ-ی-خدایه

جان بالا سن منیم یاوه‌ریم‌سن

فرقی یوْخ سن منیم اکبریم‌سن

نوجوانیم بالا باغرێ قانێم (2)