نئچه گؤزل نوحه و مرثیه

 

قوشار: غلام علی آذری

منبع: کتاب شانلی پرچم – سال1372


وداع امام حسین علیه السلام

 

بزم یاره باجی ایستیر منی جانان آپارا

سنیده شئمر چکه شامه اوره‌گ قان آپارا

 

صبر ائله گلمه نوایه دئمه یوخدور کؤمه‌گیم

اگمه باش دوشمنیمه سینه‌می پئیکان آپارا

 

قارداشین دوشمنه باش اگمه‌ییب اگمه‌ز بیلیسه‌ن

قتله مین دفعه اگر قاتیلیم عطشان آپارا

 

من گره‌ک جانیمی جانانه بو گون قوربان ائده‌م

عاشیقی صادق اودور جانینی جانان آپارا

 

عاشقم حقه باجی بو یولو من گئدمه‌لییه‌م

قورخمارام ظالیم اگر قتلیمه فرمان آپارا

 

گره‌ک عالملره من گؤسته‌رم حقین یولونو

باجی حق عاشیقی اؤز عهدینه پئیمان آپارا

 

اؤله‌جک جومله یارانمیش، هامیلار گئتمه‌لیدیر

اؤزو آغ اول کیشیدیر حقه وئره جان آپارا

 

من بوگون قانیمیله‌ن حقی گره‌‌ک زنده ائده‌م

غبطه بو ایشلریمه حق سئوه‌ن اینسان آپارا

 

سنده اعلان ائله حقی؛ باجی جان! گئدسن هارا

قورخما دوشمن سیزی زینب هارا گیریان آپارا

 

حق دییه‌ن باش و جانیندان گره‌ک عالمده گئچه

حقه جانین باجی جان تا ائده قوربان آپارا

 

گئدمه‌سه جان باشیله جان حق دیری قالماز بیلیسه‌ن

گره‌ک حق ریشه‌سینه قان آخا هر آن آپارا

 

نئیزه ده من باجی جان، ناقه ده سن ولوله سال

ائله ایش گؤر کی سنه غبطه سلیمان آپارا

 

من آتام شیرخدا تک بیلیسن کی اسدم

اؤله‌رم قویمارام آمما دینی شئیطان آپارا

 

گئدیره‌م جانیمی من حق دینه قوربان ائلییه‌م

سنده قویما گمیمی باجی بو طوفان آپارا

 

دئدی تا سؤزلرینی ییغدی عیالین باشینا

ایسته‌دی تشریف او دم میدانا سلطان آپارا

 

زینب آغلار گؤزیله بوینونا سالدی قولونو

باجینین آزجا قالیب قلبی اولا قان آپارا

 

دئدی قوی بیر دولانیم باشیوا گئد قارداش حسین

فخر ائده‌ر باجی جانین قارداشا قوربان آپارا

 

قوی الین بو اوره‌گین باشینا تا حالیمی بیل

آز قالیر قلبیم اولا هئجریوه شانشان آپارا

 

بیر اومودوم سنیدین سنده گئدیرسن نه ائدیم

کاش منیده سنه قوربان ائده عدوان آپارا

 

الینی قویدو باجی قلبینه اول دم شه دین

غصه‌دن گؤردو باجی آزجا قالیر جان آپارا

 

دئدی آللاه باجیما صبر اؤزون ائیله عطا

اولا بو قیزلاریما یولدا نگهبان آپارا

 

کیم گله درگه‌هیزه مایوس اونو ائیله‌مه‌سیز

راضی اولمایین بو نوکری غصه فراوان آپارا

صص  141-144

 

 

حضرت ابوالفضل ع-ین احوالاتی

 

سنه قوربان ایکی گوز بیر یارالی باش دئمیشه‌م

بیر باش اوسته ایکی قولدا سنه قارداش دئمیشه‌م

 

قول نیثار ائیله‌میشه‌م، بیر قالیر باش کسیله

سن گله‌ن یوللارا باشیمدا حسین کاش کسیله

فخریدیر قارداشا قوربان اولا قارداش کسیله

من غلامم سنه بو جانیمی پئشکاش دئمیشه‌م

 

بده‌نیمده دئمیره‌م اوخلار حسین شهپه‌ر آچیب

داغیدیب نئیزه قیلینج هر طرفین پرپر آچیب

دئییره‌م بیر بده‌نه ال نئچه مین کافر آچیب

باشیمی ایندی کسه‌ر، گلمه‌سن اوباش دئمیشه‌م

 

دوشمانیم وئرسه امان قانیمی گؤزده‌ن سیله‌ره‌م

یوزوم اوسته سورونوب خئیمییه قارداش گله‌ره‌م

دیزین اوسته قویارام باشیمی بیر دینجه‌له‌ره‌م

دیزین اوسته کسیله‌ر، باشیمی ائی کاش دئمیشه‌م

 

گل هرایه نئجه گؤر بوردا قیامتدی منه

دوره‌می دوشمن آلیب قصدی خیانتدی منه

دوشمه‌نین خوش سؤزو جان اوسته شماتتدی منه

منیم احوالیما قان آغلییا داغ داش دئمیشه‌م

 

نه گؤزومده وار ایشیق رحمسیز اوباشی گؤره‌م

داش گله‌نده رفع ائده‌م دگمییه هر داشی گؤره‌م

جان وئره‌ن دمده حسین سن کیمی قارداشی گؤره‌م

جان وئره‌نده منیله‌ن بیرده قوجاقلاش دئمیشه‌م

 

بیر شقی سجده‌گهی ائتدی حسین تیره نیشان

آلنیمین قانی آخیب، یوز گؤزومه اولدو روان

دیلیم آغزیمدا دولانمیر دییه‌م ائی شاه-ی-جهان

ایندی زینب یئری وار گر تؤکه قان یاش دئمیشه‌م

 

سینه‌م اوسته نئچه مین بیلمیره‌م اوخلار دوزولوب

طاقتیم یوخ ایاقا دورماغا قانیم سوزولوب

حفظ ائده‌م جانیمی یوخدور الیم الده‌ن اوزولوب

ساغ قالا نئیله‌ییره‌م پارچالانا قاش دئمیشه‌م

 

سنه قوربان ائله‌دیم قارداش حسین اللریمی

دوشمه‌نین قوی اوخو دلسین بوسوسوز حنجریمی

پاره پاره ائله‌سین داشیله اوخ پیکریمی

منده خوشدور داغیدا بو بده‌نی داش دئمیشه‌م

 

بیر شقی آهن عمود بو یارالی باشه ووروب

عومرومین شیشه‌سینی قارداش حسین داشه ووروب

گل هرایه نقدر گؤر یارا قارداشه ووروب

یوخدو بوردا منه سندن سورا یولداش دئمیشه‌م

 

دمبدم نئیزه قیلینج قلبیمی اوخلار دلیری

صاق یئریم یوخدو بده‌نده یارا اوسته‌ن دگیری

نفسیم تنگه دوشوب گلمه‌سن عباس اؤلوری

سن گلینجه اجله مندن اوزاقلاش دئمیشم

 

صص 218 الی 221

 

حضرت علی اصغر نوحه‌سی

 

ایچماغا سو سوسوز بالام گئتدی یوباندی گلمه‌دی

قارداشی تک یقین بودا قانه بویاندی گلمه‌دی

 

رقیه جان دو چاره قیل، یولیندا قالدی گؤزلریم

گئدیب گتیر خبر منه هایاندا قالدی اختریم

قیزیم منی هلاک ائده‌ر، سوسوزدان اؤلسه اصغریم

صبریم ائوی رقیه جان یاندی تالاندی گلمه‌دی

 

هاردا سو اولماسا قیزیم او یئرده غنچه‌لر سولار

اسه‌ر خزان یئلی اورا، او چؤل فغانیله‌ن دولار

عطشدی گؤردوم اصغریم دئدیم سو تاپ هلاک اولار

بابان گئده‌نده‌ن آغلیرام، ایشیم فغاندی گلمه‌دی

 

گئده‌نمیره‌م دو چاره قیل، من اصغرین سوراغینا

تاپام اونو قویام بالا دوداقیمی دوداغینا

من اؤل‌لم اؤلسه اصغریم دؤزه‌نمه‌ره‌م فراقینا

آنایه سودامه‌ر داغی باری گیراندی گلمه‌دی

 

آنانین اوغلو گر اؤله، آهو کیمی مله‌ر قیزیم

اؤلونجه وای بالام دئیه‌ر قانیاش اوزه اله‌ر قیزیم

فکر ائتمیره‌م بو عرصه دن غونچه گولوم گله‌ر قیزیم

گئده‌نده‌ن او ایشیم منیم ای وای آماندی گلمه‌دی

 

بو چؤلده بیربه‌بیر قیزیم سولدو سارالدی گول‌لریم

گئتدی بالامدا گلمه‌دی قالدی سینه‌مده ال‌لریم

سینه‌م میدالی گلمه‌دی یولوندا قالدی گؤزلریم

دئمیر بالام کی بوآنام چوخ نیگراندی گلمه‌دی

 

ایاقه دور گئد عممه‌وین خیامینه یئتیر سلام

سوروش دئنه ندیر سبب یوباندی گلمه‌دی بابام

خبر گتیر قیزیم! اؤلوب یا زنده‌دیر سوسوز بالام

قلبیم غمینده اصغرین اود دوتدو یاندی گلمه‌دی

 

سیزیلدیسی صوبحه کیمی یانمیش بو قلبی داغلئییب

خراش ائدیبدی سینه‌می اشگین عذاره باغلئییب

اونون او پوزغون حالینه بیچاره آنان آغلئییب

بالام هایاندا قالدی بس قلبیم دایاندی گلمه‌دی

 

بو گون بو چؤلده حرمله ظولمین جهانه بیلدیره‌ر

عطشاندی بیلمه‌ز اصغریم اوخلار بوغازین اؤلدوره‌ر

پئیغمبر اوغلون آغلادارابن زیادی گولدوره‌ر

قلبیم سیخیلدی وای منه تیره نیشاندی گلمه‌دی

 

اوغولسوز ائتدیله‌ر منی قاراگونوم نیشان وئریر

اؤلور یقیندیر اصغریم آتا ال اوسته جان وئریر

تیتریر اوره‌ک اسیر بدن نیشان منه هر آن وئریر

یقیندیر اصغر اوغلانیب اوتوگو قالدی گلمه‌دی

 

رقیه گل من اوخشاییم سن آغلا اؤلدو قارداشین

غونچه زمانی حرمله الینده سولدو قارداشین

اؤلونجه آغلاسن قیزیم بو چولده قالدی قارداشین

گؤره‌نمه‌سن داخی اونو روحی رواندی گلمه‌دی

 

صص 214- 211