اوْخشاما


+ کهنموئی - مکتب کربلا

کتاب مکتب کربلا

سید حسین کهنموئی


قارداشیم عباس اؤلوبدور قامتیم اگدیر باجی

بو مصیبت هامی دردلردن بیل اعظمدیر باجی


 

اوخلانیب سو مشکی، قوللار بده‌نده‌ن آیریلیب

یئرده بی صاحیب قالان شمشیر و پرچم‌دیر باجی

 

هر نه قوت وار قوشوندا قوّه-ی- پرچم ده وار

پرچمی حفظ ائیله‌ین بیر بازی-ی-محکم دیر باجی

 

نه دئییم قارداشیمین چوخ سؤزلری سینه‌مده وار

درد-و-محنتله دولان بو یاره سینه‌مدیر باجی

 

اسه‌ریدی پرچمی یاران هامی دیلشادیدی

وعده-ی-نصرتله ویران قلب‌لر آبادیدی

هر قدر کی دوشمه‌میشدی قوللاری آزادیدی

من گؤروردوم قارداشیم جنگه مصمّم‌دیر باجی

 

تا آلیردی قارداشیم تشنه اوشاقلارین سسین

قصد ائدیردی ساکت ائتسین آغلایانلار ناله‌سین

مشگی دولدوردو چیخیب لئشگر آلیبدیر دوره‌سین

یوز قویوبدور خئیمه‌گاهه قصدی محکم‌دیر باجی

 

دوشدو سس لئشگر ابوالفضلی خیامه قویمایین

سو آپارسین بچّگان-ی-تشنه‌کامه قویمایین

قویمایین آزاد اولوب یئتسین مرامه قویمایین

مرگینه قارداشیمین بو ایش مقدّمدور باجی

 

رتبه‌‌ی عباسیمه چوخلار چکیب رشک آغلادی

مشکینه بیر اوخ دگیبدیر حالینه مشک آغلادی

گؤردو سقّا سو هده‌ر گئتدی تؤکوب اشک آغلادی

قانه الوان یوزگؤزو اشکیله پُرنَمدیر باجی

 

اونداکی سو مشکی اوخلاندی دگیشدیردی سؤزون

ایسته‌دی تا گؤرمه‌سین تئشنه اوشاقلاری یوزون

جان وئریب میدانیده غَمدن قوتارسین اؤز اؤزون

قارداشیم صاحیب مقامات –و-مکرّمدیر باجی

 

سؤیله‌دی قارداش حسین گل درک ائیله قارداشیوی

قارداشون جان تاپشیریر آچ باشی اوسته باشیوی

آغلا قارداشون اؤلور تؤک عاریضه گؤز یاشیوی

ایکی قارداش یوزیوزه قویسا نه عالمدیر باجی

 

قارداشیمین پئیکری قولسوز جفادن اوخلانیب

حملی ممکن اولمادی قطعه به قطعه دوغرانیب

قارداشیم حالین گؤره‌ندن اود توتوب قلبیم یانیب

بو غمیم گلمه‌ز حئسابه چوخ بؤیوک غمدیر باجی

 

قارداشیم نعشین قویوب مئیداندا یالقوز گلمیشه‌م

پئیکری پاره دوشوبدور یئرده قولسوز گلمیشه‌م

قالمیشام بو چؤلده قارداشسیز اوغولسوز گلمیشه‌م

حالتی قارداشیمین گؤزده مجسّمدیر باجی

 

صص 119-121

**********

 

باشون جیداده گؤرموره‌م قارداش ابوالفضل

هاردا قالیبسان بیلمیره‌م قارداش ابوالفضل

ای وای منه، آت بوینونا باشون آسیبلار

قالدیم نییه من اؤلموره‌م قارداش ابوالفضل

 

سن آیریلاندا خئیمه‌دن من گؤرمه‌میشدیم

هاردا  دوشوب قولسوز بده‌ن من گؤرمه‌میشدیم

سقّائی عطشان جان وئره‌ن من گؤرمه‌میشیدیم

ظولمیله قوللاری قلم قارداش ابوالفضل

 

بئیله ائشیتدیم گؤرمه‌دیم ای دل خجسته

ضرب –ی عمودیله اولوب باشون شکسته

بو علّتیله دورمئییب بیر نئیزه اوسته

باشون آسیلدی لاجرَم قارداش ابوالفضل

 

رخساره شه قانین یاخان سرلئشگر ای وای

سلطانیه حئیران باخان سرلئشگر ای وای

اوخلو گؤزونده‌ن قان آخان سرلئشگر ای وای

قالدی سوسوز اهل-ی-حرم قارداش ابوالفضل

 

نعشون یئر اوسته تاپمادیم من کربلاده

گلدیم اوره‌کده‌ن نئی کیمی فریاد-و-داده

باشلار یانیندا گؤرمه‌سم باشون جیداده

زیبنده‌دیر جان بذل ائده‌م قارداش ابوالفضل

 

سلطان-ی-دینه –و-مذهبه همراز اولوبسان

هر بیر مقاموندا عجب ممتاز اولوبسان

سقّا عملدار اولموسان-سرباز اولوبسان

سلطانی ائتدین قدّی خم قارداش ابوالفضل

 

کلثومه قارداش نییه لوطفون آزالدی

گول فرقتینده بولبولون رنگی سارالدی

باشون جیداده گؤرمئییب حئیره‌تده قالدی

شوریده دل بیر بولبولم قارداش ابوالفضل

 

صص 121-123

***************

 

کربلانین املیک قوربانی‌نین شهادتی

 

ای حسینین آللاهی شاهید اول اوخلانیب سوسوز سودامه‌ر بالام

اوچ گئجه گونوز لبلرین امیب ایمدی قانلی پئیکان امه‌ر بالام

من ازل کی گون وعده وئرمیشه‌م کربلاده بیر ایمتحان وئره‌م

نونهالِ باغِ ریسالته، سو یئرینه بو چؤلده قان وئره‌م

قویمایام شریعت گولو سولا عئشقیمی جهانه نیشان وئره‌م

عهدیمه وفا ائیله‌دیم بوگون تئشنه اوخلانیب مُحتضَر بالام

(کهنموئی)

دوغرادی جاوانلاریمی سوسوز بیربه‌بیر بوگون قومِ اشقیا

صبر قیللام هر بیر مصیبته هر قضایه وئرره‌م خودا ریضا

اکبریم اؤله‌نده بو حالته دوشمه‌دیم اَیا خالق-ی-علا

آه-ی-آتشینله بو جانیمه اوخلاناندا ووردو شَرَر بالام

(عاصی)

ماه-ی-آل هاشم بو دشتیده ائیله‌دی خدا ظولمیله خسوف

شمس-ی-آل هاشمده آز قالیر ابر-ی-خونیده ائیله‌سین کسوف

اللریمه بو سود امه‌ر بالام گلمیشه‌م بو درگاهه یا رئوف

شاهید اول بو قانلی قماطیله محشره بو نوعی گله‌ر بالام

(محسن رهنما جورابچی)

بو منای عئشقیمی دولدوروب یئتمیش ایکی قوچ قوزو قوربانیم

فرد فردینین حق‌لییه‌م اگر هئجرینین اودونا یانار جانیم

بی گمان منای محبتون قانلی توپراغین خوش بویار قانیم

قانلی قونداغیله ولی گؤزل بو منای عئشقی بزه‌ر بالام

(ذهنی زاده)

 

من موفّق اولدوم مرامیمه شوکر اولا سنه حی-ی-لایَنام

آز قالیر سوسوز جان وئره‌م اؤزوم ائیلییه‌م هامی عهدیمی تمام

خیدمه‌تیمی تکمیل ائدیب منیم الّلریمده بو طفل-ی-تشنه کام

قانیله بویاندی بو عرصه ده وئردی یاخشی بیر پُر ثمر بالام

(کهنموئی)

دین یولوندا گر چی بو چؤلده من کسمیشه‌م تمام-ی-علائقی

بیلمه‌ره‌م اؤزومو بو حالیله لیک وصل-ی-دلدار لایقی

شئمر الینده کی خنجرین سویون بو سوسوز دوداقلاردی شایقی

اصغریمده جان وئردی تشنه لب ائیله‌دی منی مفتخر بالام

(کهنموئی)

من بو شیرخواری گتیرمه‌دیم بو اوموده بیر جرعه سو ایچه

ایسته‌دیم بو ظالیم جماعتین ظولم – و-جوری اندازه‌دن گئچه

لیک گلمه‌زیدی گومانیمه اوخ قیلینج بوغازین بئله بیچه

سو یئرینه بیلمه زدیم اوخ گله‌ر الّلَریمده اَلده‌ن گئده‌ر بالام

(ذهنی زاده)

گر چی اوخلانیب تئشنه لب بالام حالیمی پوزوبدور مصیبتی

سن بیلیرسن حسینیوینده واردور بو حاله دلده‌ن ریضایتی

نئیله‌ییم آناسی گؤزه‌تلیری گؤز تیکیب یولا واردی حسرتی

بیلمیری ایچیب سو یئرینه قان ظولمیله اؤلوب سود امه‌ر بالام

(عاصی)

آتش –ی-فراقیله وار یئری عالمه بو گونده شَرَر سالام

دلخوشام اوره‌کده‌ن من ای خدا بو منایِ وحده‌تده تک قالام

اوخ دگه‌نده نازیک بوغازینه گؤز آچیبدی دیسگیندی بیر بالام

ائیله‌دیم من ائحساس او وقتیده شمع-ی-تک الیمده سؤنه‌ر بالام

(محمود نالان)

هر مصیبت و درد و محنتیم بیر یانا بالام دردی بیر یانا

سن بیلیرسن آللاه بو سود امه‌ر نیسگیلیله باغریم دؤنوب قانا

بیر ایچیم سو اوستونده کیم گؤروب ظولم اوخیله سودامه‌ر اوخلانا

لامحاله باخمادی حرمله وورماسئیدی پئیکان اؤله‌ر بالام

(ذهنی زاده)

مین بئله بلا-و-مُحَن یئته، منده وار دؤزوم اولمارام ملول

باخمارام خییه‌مده سو ایستیری آغلاشیر هامی عترت-ی-بتول

واردی خواهیشیم لیک ای خدا قیل گیله‌ن بو قوربانیمی قبول

چون اؤزون بو کوی-ی-محبتین بیرقوزو فداسی بیله‌ر بالام

(عاصی)

گؤردو اصغریم دین کمک لری ائیلئییبله بو چؤلده ایتّیفاق

نوش ائده‌ن شهادت پیاله‌سین محضر-ی-نیگاره گئده‌ر قوناق

ایستدی فدایان-ی-دینیده‌ن قالمییا دالی تئشنه بو اوشاق

لعل تک اودور سرخ فام اولوب قیرمیزی لیباسی سئوه‌ر بالام

(کهنموئی)

صص 124 – 127

*********

نویسنده : حسین محمودی و یولداشلار ; ساعت ٥:۱٠ ‎ب.ظ ; چهارشنبه ۱ آذر ۱۳٩۱
comment نظرات () لینک