کتاب شمیم عاشورا

حاج اصغر احمدیان خسروشاهی

 

هاردا قالیب رشید عموم قانه باتیب علم بابا

یوخسا سو اوسته قوللارین ائیله‌دیله‌ر قلم بابا


 

رزمگهه گئده‌ن زامان، باخدی سوسوز دوداقلارا

وئردی سو وعده‌سی اؤزو، تئشنه جیگر قوناقلارا

الده سو جامی صف چکیب، من نه دئییم اوشاقلارا

هاردا قالیب رشید عموم، قانه باتیب علم بابا

 

عالم اولا فدا اونون، غئیرتینه وفاسینه

دلدن علاقه‌مندیدی، تک به تک آل-ی-یاسینه

تئشنه بو جانیمیز فدا، قانه باتان لواسینه

هاردا قالیب رشید عموم، قانه باتیب علم بابا

 

ای شه بی سپه سنین، بس هانی میر-ی-لئشگرون

تک گلمیسه‌ن سبب ندیر، قانه باتیبدی اللرون

گلمه‌دی قارداشون ندن، یاشلیدی نازلی گؤزلرون

هاردا قالیب رشید عموم، قانه باتیب علم بابا

 

بس هانی نامدار عموم، قانه دؤنوب بو گؤزیاشیم

الده سو جامی آغلیری، وار نئچه تئشنه یولداشیم

بیرده سوسوزدو سودامه‌ر، نازلی او خیردا قارداشیم

هاردا قالیب رشید عموم، قانه باتیب علم بابا

 

قدّیوی بار-ی-غم بوکوب، قانه دؤنوبدو گؤزیاشون

آغلاما من فدا سنه، بس هانی یار-و-یولداشون

بئلده الون چوخ آغلیسان، یوخسان اؤلوبدو قارداشون

هاردا قالیب رشید عموم، قانه باتیب علم بابا

 

وئردی بیزه سو وعده‌سی، گلمه‌دی وار نه عیلّتی؟

جانینی وقف ائدیب بیزه، چوخدو وفا-و-غئیرتی

گلمه‌ز او با وفا یقین، واردی سودان خجالتی

هاردا قالیب رشید عموم، قانه باتیب علم بابا

 

چوخ بیزه خیدمت ائیله‌دی، گتدی بورا مدینه‌دن

قویمادی آهیم اوج ائده، سوز-ی-درون-ی-سینه‌دن

ایمدی سبب نه اولدو بس، کسدی نظر سکینه‌دن

هاردا قالیب رشید عموم، قانه باتیب علم بابا

ص 111 – 113

***************

 

آغلاما باجون رقیه، گؤزلرون فداسی قارداش

منده تشنه‌ام سنین تک، ای دلیم صفاسی قارداش

 

هانسی شیرخواره سن تک گل کیمی سولوب سوسوزدان

سو تاپیلمیری بو چؤلده، اینجیمه بوگون باجوندان

ائیله‌دیم سو التماسی من علی رشید عمومدان

خیردا قیزلارین اوجالمیش العطش صداسی قارداش

 

غنچه‌لیق زمانی هاردا گول بئله سولوب چمنده

باجی قارداش ایکیمیزده تئشنه ایندی سنده منده

کیم گؤروب یانا سوسوزدان شیرخواره سودامه‌نده

چاره سیز قالا او حاله، آغلییا آناسی قارداش

 

گاهواره‌وین اوشاقلار دولانیر علی باشینا

ولی آندیریر اؤز حالین هامی گؤزده گؤز یاشیندا

نئجه تاب ائده‌ر بو حالی باجی گؤرسه قارداشیندا

سودامه‌ر اولا خصوصا" اوجالا نواسی قارداش

 

هئچ چیمنده گول سنین تک غونچه لیق زامانی سولماز

دوزدو گول سولار چیمنده سن کیمی ولی پوزولماز

باجیه جاهاندا بوندان بیر اثرلی نیسگیل اولماز

آغلیری گؤره بئشیکده سودامه‌ر اخاسی قارداش

 

العطش دئییر سوسوزدان گول کیمی سولان دوداقلار

ائیلییری سو التماسی خیرداجا سوسوز قوناقلار

دولانیر سو جامی الده علی تئشنه لب اوشاقلار

هامینین سولوی عطشدن رخ-کهرباسی قارداش

 

سنه بیر سویا گومانیم بو گؤزومده گؤز یاشیم وار

دولانیر منیله آغلار نئچه تئشنه یولداشیم وار

هامیسی بیلیر سوسوزدو شیرخواره قارداشیم وار

سن ائده‌نده ناله دؤزمه‌ز بو غم آشناسی قارداش

 

سنه من دینه‌نده لای لای منه سس وئریر سوسوزلار

باخیر الده بوش سو جامی یوزیوه بو خیردا قیزلار

بو سؤزو رقیه ازبر ائله‌ییب یانار سیزیلدار

گله جانیمه او آغلار گؤزیوین بلاسی قارداش

صص 114-115